Colegau'n rhannu gwobr datblygu gweithlu
19 Mawrth 2007
Mae enillwyr gwobr llawn bri i golegau AB Cymru wedi eu cyhoeddi. Bu i chwe choleg gystadlu am wobr fforwm/ LLUK mewn perthynas â datblygu gweithlu ym maes addysg a hyfforddiant ôl-16. Ond roedd cyflwyniadau dau goleg o safon mor rhyfeddol o uchel nes i'r ddau, sef Coleg Llandrillo a Choleg Menai, ennill y wobr gyntaf.
Amlinellodd Coleg Llandrillo raglen wych, gan gynnwys y system STEPS (System Cynllunio Hyfforddiant a Digwyddiadau i Staff). Mae llawer o golegau o Gymru a gweddill y DU wedi ymweld â Llandrillo er mwyn gweld STEPS ar waith ac mae hyn wedi cyfrannu at y coleg yn ennill 'statws seren' Gwobr Cwmnïau Gorau 2007.
Roedd prosiect Coleg Menai, 'Cefnogi Staff i Gyflawni Rhagoriaeth' yn enghraifft o weledigaeth a nod y coleg i gynorthwyo staff i gyflawni eu potensial llawn trwy raglenni hyfforddi a datblygu parhaus. Mae blaenoriaethau datblygu staff yn cynnwys sgiliau arwain, TGCh, a dysgu ac addysgu. Mae pob un o'r rhain yn gysylltiedig â safonau cenedlaethol (LLUK).
Roedd y wobr yn un o wyth gwobr gan fforwm a gyhoeddwyd yng nghynhadledd flynyddol fforwm yng Nghaerdydd, sy'n cydnabod cyfraniad colegau mewn gwella safonau addysg a hyfforddiant AB a chyflawniadau dysgwyr. Canmolwyd yr enillwyr am eu cyfraniad i adeiledd economaidd, cymdeithasol a diwylliannol Cymru, ac am gychwyn a hybu datblygiadau allweddol er budd dysgwyr.
Mae rhestr lawn o'r enillwyr a gwybodaeth bellach ar y gwobrau ar gael.
